زمن عجاب

دنيانه لا ماتنحزر
لاتنفهم لا تندرس

المزور يحصل عفوا
والفقره ظلت بالحبس

الدنيه دوختني صدك
ملعوبه جن طوبة تنس

البايك ترفعه بسمه
والفقره تكبسهم كبس

بهذلني انه حيل الزمن
بهمومه تارسني ترس

من همي خطيت الوزن
وتاهو علي بكره وامس

حطوها خضراء بقفص
خافوا شعبهم مفترس

وسجنوا مناطق بالحجر
وكعوا على الناس العلس

واحدهم يعيش بقصر
بالفقره ابدا ما يحس

مايه ويناسه منخبط
ويالغربه جن دهن ودبس

عفيه شعب حظك فكر
باليحكمك حظك نحس

امنيات

مو كل ماتتمنه يصير
ولا كلشي تريده موجود

ولا كل ايامك احزان
ولا افراح بلون ورود

صح يعشك بن ادم دوم
ويفكر جن ماكو حدود

يحبا سمرة مشعر السود
حلوه ام عيون السود

لو حبا شكرة ام شعر الاصفر
وخضر عيون وحمر خدود

يرسم عالم من افكاره
مابي اي منع ومسدود

ويضل محتار بايامه
ويفكر بافكار هنود

مثل الهندي اللاكي بنيه ومربيهه
وتطلع امه وياحيف بذاك المجهود

اسف موقصي اني امزح
سهوا جتي مو مقصود

اني بقلبي احبا وحده
وحبه العندي دوم يزود

ما فكر انساها بلحظة
ولحبه عندي انه حدود

شكد ردت ارحل وابعد عنه
وما يوم ارجع اله وعود

لكن قلبي مايتحمل
ويردني بخطواتي ردود

حلو كلك حبيبي مابيك اي عيب
جذب من يكول الحلو مايكمل

عالم الحب

على باب الصبر تانيتك اسنين
لان باب الفرج مايوم مفتوحه

وعلى مر الليالي وشوك ملكاك
كتبت انه بمحبتك اروع اطروحه


مثل عالم صرت كاضيهه مسجون
الف هالكتب للناس مشروحه

شرحت انه حقائق بالعشق نور
من شاعر كتبهن تنزف جروحه

طفل كلبي حبيبي انه بجفاك
اجاه العيد وحده بدون مرجوحه

اي شي بالعرف ياناس محضور
لكن بالمحبه اشياء مسموحه

Y-A

الهموم

نسينه همومنه من كد الهموم 
وماتغمض العين بدون حسرات

تنام بدمع عيني وتصحه بدموع
وضيعته البديه الجاي والفات

اعد انه الليالي واحسب ايام
وامشيي للحجي الكالوا شمات

سفينة نوح صاير شايل هموم
مبحر وسط حزني بدون مرسات

بهمومي سنين وعبرن العشرين
وكاضيهن شهور ايام ساعات

ماشفت الفرح ماعرفه شلون
لانه بالحلم مامرلي لحظات

وجه مره رسمته مبتسم غلطان
وسال من العيون اللون دمعات

من كثر الهموم حاير احطهن وين
ترسا ترس بيتي وزاد كلمات

عندي انه هموم بكد الهموم
وبكد الاكو احياء واموات

Y-A

بعد الفراق

الاحبة رحل عني 

ودربه لامابيه رجعه

وطلكت لشفاف ضحكه

 وصاحبة العيون دمعه

جنتي اليه احلى دنيه

واحلى صوت الجنت اسمعه

وجنتي نور لكل حياتي

 بشوك الج ملهوف اتبعه

شو مكلتي من رحلتي

 مر فراكج شلون اجرعه

وشرد اخبر كليبي عنج

 وروحي شيصبره تنعه

شلون راح الي احبه

 بيا ذنب لوبيدي ادفعه 

حق علينه مو بدينه

 لو يجي مابينه دفعه 

اشواق قلبي

انه بناري احترك داخلي كلب الكاع
بس وجهي بشوش تكول بالجنه

فوكايه ثلج وارتجف ما بردان
حمم بعدك علي الجسد هزنه

اذا تسمعني اغني تعتقد فرحان
وانه بصوتي وعذابي الناس تتغنه

يسمعوني اغني في فرح اهواك
لكن في هواك احزاني والونه

انه باقي جسد وكليبي ميت شوك
وجروحي مساحي اللحدي حفرنه

حفرنه بغمج مولحد جنه بير
وفوكاي التراب هموم ذرنه

وماخلن اثر شاخص الي ومعروف
كبري وي سوايه الكاع ساونه

وفوكاي الشماته طشت الجليت
وبواجيهن فرح ع ترابي صبنه

مو حزنن عليه حاقدات هواي
حت ميظل اثر شاخص يضيعنه

يعرفني افز لو يمر يمي هواي 
افوج تراب كبري وجفني اشكنه

واحظننه بديه مثل طفل صغير
حظن امه اذا عماته حادنه

يالكلبي تسكنه وتملك الروح
وكل حواسي الك بكل شوك يردنه

لذلك انه احبك واني ميت بيك 

وتتمنه اديه بشوك ضمنه
وبستان حب او وفه بهواك ضمنه
وعيوني فضحني الك ماحبي ضمنه

وكل حب البداخلي مفضوح منهنه
وابدا ترى بالهوى ياصاح منهنه
ونشكر المبارك ترى ياروحي من هنه

وكل العشك والحزن بالشعر ضمنه

بقلمي 
Y-S